Misleiding verg Onderskeiding
Mense raak toenemend afvallig van die Kerk van Christus. Die Kerk raak toenemend afvallig van haar Hoof, die Here Jesus Christus. In die Kerk is daar toenemend “mense wat ’n gedaante van godsaligheid het, maar die krag daarvan verloën het.” (2 Tim. 3:5). Daar is selfs baie gemeentes wat die naam het dat hulle leef, maar hulle is dood (sien Op. 3:1). Oor die algemeen is die Kerk in ‘n toestand van louheid. Daar is gemeentes wat ryk is en aan niks gebrek het nie, maar die Here Jesus sê hulle is “ellendig en beklaenswaardig en arm en blind en naak” (Op. 3:17).
Dit is nie heeltemal onverwags nie, die Bybel skrywers het dit onder inspirasie van die Gees van God voorsien, en gewaarsku. 1 Tim. 4:1: “Die Gees sê uitdruklik dat in die eindtyd sommige afvallig sal word van die geloof. Hulle sal misleidende geeste navolg en die leerstellings van bose geeste aanhang.” (NAV) Die Here Jesus het ook gewaarsku teen vals predikers volgens Mat. 7:15: “Maar pas op vir die valse profete wat in skaapsklere na julle kom en van binne roofsugtige wolwe is.” (OAV). In 1 Tim. 4:2 word hulle ook nie juis gekomplimenteer nie: “Hierdie dwaalleraars is skynheilige leuenaars wie se gewete toegeskroei is.“ (NAV). Die apostel Petrus waarsku ook teen vals profete en vals leraars in 2 Pet. 2:1.
Die vals predikers se misleiding is ook nie te moeilik nie, want in die laaste dae sal “die mense … selfsugtig wees, geldgierig, grootpraterig en verwaand, beledigend teenoor hulle medemense en ongehoorsaam aan hulle ouers, ondankbaar en ongodsdienstig; hulle sal liefdeloos en onversoenlik wees, kwaadpraters, bandeloos en wreed, sonder liefde vir die goeie; hulle sal verraaiers wees, roekeloos en hooghartig. Hulle sal eerder liefde vir genot hê as liefde vir God. Hulle sal nog die uiterlike skyn van die godsdiens hê, maar die krag van die godsdiens sal hulle nie ken nie.“ 2 Tim. 3:2-5 (NAV). Verder sal “die mense die gesonde leer nie meer … verdra nie. Hulle sal hulle eie begeertes volg en vir hulle leermeesters bymekaarmaak wat net sal sê wat hulle graag wil hoor.” 2 Tim. 4:3 (NAV).
“Maar wie volhard tot die einde toe, hy sal gered word.” Mat 24:13 (OAV). Daarom behoort ware gelowiges hierdie afvalligheid te onderskei en te weerstaan. Judas vermaan gelowiges in vers 3 “om kragtig te stry vir die geloof wat eenmaal aan die heiliges oorgelewer is.” (OAV). Die mense van Berea wat na Paulus-hulle se prediking geluister het stel ‘n voorbeeld wat deur elke gelowige gevolg behoort te word. “Hulle het met groot belangstelling na die woord geluister en elke dag die Skrif ondersoek om te sien of dit is soos Paulus sê.” (Hand.17:11 NAV).

Elke gelowige behoort verantwoordelikheid te aanvaar vir sy/haar geloof. Paulus moedig die Filippense as volg aan in Fil. 2:12b: “werk julle eie heil uit met vrees en bewing;” Deur die Bybel biddend te bestudeer met ‘n ontvanklike gemoed, in vertroue op die leiding van die Heilige Gees sal die gelowige die wil van God leer ken.
Paulus waarsku in 2 Tess. 2:10-12: “…, omdat hulle nie die waarheid liefgehad en tot hulle redding aanvaar het nie. Dit is ook waarom God hulle aan die mag van die dwaling oorgee, sodat hulle die leuen sal glo. En so sal almal wat nie die waarheid geglo het nie, maar die ongeregtigheid verkies het, veroordeel word.” (NAV). Daarom moet ons die waarheid liefhê, bo alles, soos wat ons God moet liefhê, anders sal ons ook die leuen glo.
Tags: afvallig, Bybel, Christus, dwaallerraars, eindtyd, gelowiges, gemeentes, glo, God, Here, kerk, leun, liefhe, misleiding, onderskeiding, ware gelowiges
christelike lewe 
Leave a comment